Það er þakkarvert að hafa bát eins og Húna II hér á Akureyri og þann frábæra mannskap sem að baki bátsins er. Á hverju ári er krökkum í sjötta bekk boðið á sjó og þar var heldur betur blíðan um daginn þegar krakkarnir í sjötta bekk Glerárskóla voru munstruð um borð.
Krakkarnir fengu margvíslega fræðslu meðan fleyið rann yfir rennisléttan hafflötinn, bæði um sögu bátsins og lífríkið í hafinu. Þeir fengu að fara upp í brú og skoða flóknu siglingartækin áður en hafist var handa við veiðiskapinn og aflinn var með ágætum.
Gert var að fiskunum og innyfli þeirra rannsökuð. Síðan kveikt upp í grillinu og aflans notið. Þetta var sá allra besti fiskur sem krakkarnir höfðu smakkað!
Myndir frá ferðinni má sjá með því að smella hér.