Í skólanum okkar eru komnir lausnastaðir sem krakkarnir í skólanum í umsjá Ingu Huldar og Ingibjargar Kristínar hafa komið upp.
Lausnastaðurinn er eitt af verkfærum Jákvæðs aga og mun koma nemendum og starfsfólki Glerárskóla vel.
Við lítum á mistök sem tækifæri til að læra og þegar nemendur gera mistök viljum við kenna þeim að taka ábyrgð og vinna í málunum. Þegar leysa þarf mál sem upp hafa komið er hægt að bjóða þeim sem að málinu koma á lausnastaðinn. Þangað fer þó enginn nema að fá til þess leyfi, þeir séu í jafnvægi og tilbúnir til þess að takast á við það sem upp kom.
Á lausnstaðnum eru hin ýmsu verkfæri s.s. lausnahjól, hugmyndir að lausnaleit, þrjú skref fyrirgefningar og VAL (viðurkenna – afsökunarbeiðni – lausn). Þessi verkfæri hjálpa til við ferlið þannig að lausnleitin verði markviss og skili árangri.
Fulltrúar allra bekkja skólans komu saman í þrjú skipti og unnu að lausnastaðnum og gekk sú vinna frábærlega. Þegar þeirri vinnu var lokið var lausnastaðurinn kynntur öllum nemendum skólans.
Fleiri myndir eru á myndasíðu skólans.