Nemendur í 5.-6. bekk Glerárskóla heimsóttu í vetur þrjá listamenn á Akureyri, þau eru þau Guðmundur Ármann Sigurjónsson, Egill Logi Jónasson (bæjarlistamaður Akureyrar 2025) og Arna Guðný Valsdóttir. Krakkarnir skrásettu heimsóknirnar með iPad og máluðu andlitsmynd af listamönnunum og settu inn á hana það sem þeim fannst spennandi og áhugavert.Markmið með verkefninu var að gefa nemendum gott tækifæri til að kynnast nánar listafólki, sköpunarferli, vinnuaðstöðu og umhverfi þeirra.
Sýning með myndverkum nemendanna verður opnuð í Menningarhúsinu Hofi laugardaginn 18. apríl kl. 14.00. Þar verða einnig sýnd myndbönd frá heimsókninni og skissur sem nemendur unnu í hugmyndavinnu.
Umsjón með verkefninu hefur Elsa María Guðmundsdóttir, MA í menningarstjórnun og sjónlistakennari í Glerárskóla.
Sýningin er styrkt af Barnamenningarsjóði Akureyrarbæjar og er í samstarfi við Menningarfélag Akureyrar.
Verið hjartanlega velkomin. Léttar veitingar verða í boði við opnunina.