Nemendur úr sjöunda bekk Glerárskóla sýndu í morgun hversu snjallir upplesarar þeir eru, en þá kepptu þeir sín á milli um hver verður fulltrúi skólans í lokakeppni Upphátt, upplestrarkeppni grunnskólanna á Akureyri, sem fram fer þriðjudaginn 18. mars næstkomandi.
Greinilegt var á frammistöðu nemenda í morgun að margir þeirra hafa lagt sig fram að undanförnu undir styrkri handleiðslu kennara sinna, Elínar Elísabetar Magnúsdóttur og Ernu Kristínar Kristjánsdóttur.
Alls kepptu fimmtán nemendur um að vera í fulltrúar skólans í lokakeppninni og þriggja manna dómnefnd fékk það erfiða hlutverk að velja sigurvegarana. Dómnefndin var skipuð Fríðu Pétursdóttir, ÍSAT verkefnastjóra í Glerárskóla, Guðrúnu Hönnu Sigurjónsdóttur íslenskukennara og Dagnýju Davíðsdóttur frá Amtsbókasafninu.
Dómnefndin valdi Freyju Mist Tryggvadóttur og Emilíu Hildi Teahtinen til að vera fulltrúar Glerárskóla í lokakeppni Upphátt.
