Mikið svakalega vorum við heppin með veður á útivistadegi Glerárskóla. Það var hvorki of heitt né of kalt. Sem sagt, fullkomið veður til að leika sér, ærslast pínu lítið og leggja af stað í leiðangra.
Krakkarnir á yngsta stigi héldu sig innan bæjarmarkanna. Fyrsti bekkur kannaði nágrenni Glerárskóla meðan annar bekkur skoðaði lystigarðinn eitt af krúnudjásnum bæjarins. Þriðji bekkur skoðaði hinar dulmögnuðu Krossanesborgir, en sá fjórði fór upp í Naustaborgir.
Krakkarnir á miðstigi fóru í mikla göngu, löbbuðu upp í Fálkafell og þaðan í Gamla og enduðu í Kjarnaskógi þar sem þeir gæddu sér á grilluðum pylsum.
Á meðan þessu stóð gerðu nemendurnir á unglingastigi sér lítið fyrir og löbbuðu alla leið upp að Hraunsvatni. Allir stóðu sig eins og hetjur og komu brosandi heim.