Það var heldur betur líf og fjör í Boganum í morgun þegar unglingadeildir grunnskólanna á Akureyri kepptu sín á milli á árlegu fótboltamóti. Fjörið og gleðin ríkti bæði á völlunum þar sem stelpur og strákar sýndu snilli sína og ekki síður á áhorfendapöllunum þar sem stuðningsliðin létu í sér heyra.
Íþróttakennarar skólanna sáu um grunnskipulag mótsins en krakkarnir aðstoðuðu við framkvæmdina og sáu meðal annars um dómgæslu. Nemendur Glerárskóla völdu sjálfir í keppnislið sín og báru sjálfir fulla ábyrgð á öllu leikskipulagi.
Mótið hófst á slaginu 8.30. Spilaðir voru 59 leikir á fjórum völlum. Hver leikur stóð yfir í 10 mínútur og einungis tvær mínútur voru á milli leikja.