Klukkan 8:20 í morgun hringdi viðvörunarbjallan og þar með hófst rýmingaræfing í Glerárskóla. Starfsfólk skólans brást við samkvæmt fyrirfram ákveðinni og vel æfðri áætlun. Viðbrögð voru fumlaus og vel gekk að rýma skólann.
Alla jafna eru tvær rýmingaræfingar haldnar á hverju skólaári. Önnur þeirra er með vitund nemenda og starfsfólks, rétt eins og núna í morgun.
Valdir bekkir fóru út um neyðarop á stofunum sínum. Aðrir bekkir skólans gengu í röð út á körfuboltavöll þar sem allir komu saman. Kennararnir fóru fyrir sínum bekk og héldu grænu spjaldi á lofti sem merki um að allir nemendur viðkomandi bekkjar sem mætt höfðu í skólann væru komnir út „heilir á húfi“.
Allt gekk hratt og örugglega fyrir sig og var vel innan þeirra tímamarka sem miðað er við.
