Síðustu dagar hafa verið óvenjulegir og um leið mjög athyglisverðir í Glerárskóla. Skólastarfið hefur gengið afar vel. Nemendur hafa verið sérlega skilningsríkir og hafa átt auðvelt með að laga sig að breyttum aðstæðum og kennarar tala bæði um mikla ró í tímum og vinnusama nemendur.
Nokkrir strákar í sjöunda bekk höfðu orð á því að þetta væri slæmt að samkomubannið skuli endilega vera í þessari viku, „þetta er besta vikan í allan vetur í mötuneytinu; pizza, snitsel og svo kakósúpa á föstudaginn og það er bara kakósúpa tvisvar sinnum á vetri og einmitt núna þegar við erum ekki í mat!“
Útivera skiptir miklu máli og meðfylgjandi mynd má sjá nemendur í 7. bekk viðra sig í góða veðrinu í morgun.
Við minnum forráðamenn á bréf sem hjúkrunarfræðingur skólans sendi frá sér í morgun. Það er mikilvægt að lesa það vel. Svo væri líka í lagi að hafa kakósúpu í matinn fljótlega 😊