Í dag breyttist Glerárskóli smám saman í skóla galdra og seiða. Um gangana flugu uglur með póst til nemenda rétt eins og í Hogwarts, skólanum sem Harry Potter og félagar hans sóttu í sögunum um galdrastrákinn.
Umbreyting Glerárskóla er vegna þemadaga þar sem unnið er með sögurnar um Harry Potter og fengust nemendur skólans við ansi óvenjulegt nám í dag, þar sem galdrar, slím og fleira kom við sögu. Í íþróttahúsinu var keppt í Quidditch og gott ef einhverjir tókust ekki á loft.
Nemendum skólans var skipt upp í fjórar heimavistir sem bera nöfn sem eru kunnugleg þeim sem lesið hafa bækurnar. Í dag og á morgun keppast nemendur við að safna stigum fyrir heimavistirnar sínar og úrslitin verða kynnt þegar kennslu lýkur á morgun.
Karen og Sveinn Leó, umsjónarkennarar í 10. bekk, skipulögðu þemadagana og nemendur þeirra eru þeim til aðstoðar á þemadögunum.
Hér og hér má sjá fréttabréf sem nemendur úr tíunda bekk unnu í dag.