Það er frábært að ærslast áhyggjulaus í snjónum, byggja virki og snjóhús, já eða bara að spila fótbolta. Ætli krakkarnir í Glerárskóla séu ekki ókrýndir Íslandsmeistarar í snjófótbolta? Þeir láta fönnina ekki hafa áhrif á sig og sýndu meistaratakta á vellinum.
Krakkarnir í tíunda bekk héldu sig að mestu innandyra í dag og tóku meðal annars á móti miklum aufúsugesti, Þorgrími Þráinssyni rithöfundi sem flutti þeim fyrirlesturinn sinn „Verum ástfangin af lífinu“ þar sem hann lagði mikla áherslu á að við berum hvert og eitt ábyrgð á árangri okkar í lífinu og „því fyrr sem þið fattið það, þeim mun betra,“ sagði hann.
Krakkarnir hlustuðu á Þorgrím í tvær kennslustundir og drukku í sig vísdóm hans.